Bakı, Azərbaycan, Avropa Mehmanxanası, 17  yanvar 2008-ci il, saat 10.00-da İqtisadi Tədqiqatlar Mərkəzi (İTM) ABŞ-ın Beynəlxalq İnkişaf Agentliyinin (USAID) maliyyə dəstəyi ilə həyata keçirdiyi “Alternativ inflyasiya metodologiyasının işlənilməsi” layihəsi çərçivəsində Azərbaycanın 22 regionunda ötən il ərzində apardığı qiymətlərin statistik müşahidəsinin nəticələrini təqdim edib. Statistik müşahidənin nəticələri gostərir ki, ötən il ərzində Azərbaycanda istehlak qiymətləri indeksi (İQİ) 28.96  faiz, Bakıda 30.04, regionda isə 27.58 faiz olub. Əmtəə qrupları üzrə ən yüksək inflyasiya səviyyəsi xidmətdə 40.28 faiz müşahidə olunub. Tədqiqat aparılan dövr ərzində inflyasiya səviyyəsi ərzaq məhsulları üzrə 28.12 faiz, qeyri ərzaq məhsulları üzrə isə 21.81  faiz təşkil edib.

Konfrans zamanı layihənin yeni mərhələsinin təqdimatı olacaq və bu mərhələdə layihə çərçivəsində görüləcək işlər, aparılacaq tədqiqatlar barəsində məlumatlar veriləcək. Belə ki, konfrans çərçivəsində inflyasiyanın yoxsulluğa təsirinin qiymətləndirilməsi məqsədilə aparılan tədqiqatların ilkin nəticələri, veb formatda  ailənin  inflyasiya kalkulyatorunun  təqdimatı nəzərdə tutulur.

Yekunda “Alternativ inflyasiya metodologiyasının işlənilməsi” layihəsinin nəticələri əsasında müxtəlif aspektlər üzrə real inflyasiya səviyyəsinin müəyyənləşdirilməsi və onun hökumətin anti-inflyasiya siyasətinin gücləndirilməsinə, biznes strukturlarının və ev təsərrüfatlarının qərarlarının rasionallığına təsiri barədə müzakirələr aparılacaq.

Daha geniş məlumat əldə etmək üçün ITM-in “Alternativ inflyasiya metodologiyasının işlənilməsi” layihəsinin tədqiqat  qrupunun rəhbəri cənab Vusal Qasımlı ilə əlaqə saxlaya bilərsiniz. Tel: (99412) 4373230 (daxili nömrə 115).

◄ 1 ... 8 9 10 ... 13 ► ₪

Sənədin sonuncu korrektə tarixi: 26/7/2008 - 12:35:50