İctimai Birliklərin Mədən Sənayesində Şəffaflığın Artırılması Koalisiyası Şurasının əlaqələndiricisi Qubad İbadoğlu iyunun 12-14-də İndoneziyanın paytaxtı Cakarta şəhərində səfərdə olub. Səfər Beynəlxalq Şəffaflıq -İndoneziya (BŞ-İndoneziya) təşkilatının dəvəti ilə reallaşıb. Səfərin əsas məqsədi Mədən Sənayesində Şəffaflıq Təşəbbüsünü dəstəkləyən yerli qeyri-hökumət təşkilatları üçün təşkil olunan seminarda Azərbaycanda MŞHT-nin tətbiqi və koalisiya quruculuğu təcrübəsi barədə məlumat vermək olub. Bununla əlaqədar olaraq Q.İbadoğlu səfərin ilk günü, iyunun 12-də Böyük Britaniya İnkişaf Agentliyinin (DFİD) əməkdaşı, MŞHT üzrə məsləhətçi David Braunla muzakirələr aparıb. Müzakirələr zamanı Azərbaycanda MŞHT-nin tətbiqində hökumət, mədən sənayesi şirkətləri və ictimai birliklər arasında əməkdaşlıq formaları, onların rolu və məsuliyyəti məsələlərinə toxunulub. Həmin gün müzakirələr hökumət və şirkət nümayəndələrinin qatıldığı konfransda davam etdirilib. Konfransda David Braunun təqdimatı olub. Təqdimatla bağlı Q.İbadoğlunun şərhi dinlənilib, müzakirələr aparılıb. Səfərin 2-ci günü, iyunun 13-də Q.İbadoğlu İndoneziyada MŞHT-nin tətbiqi perspektivləri mövzusunda keçirilmiş seminarda məruzə edib. Konfransı BŞ-İndoneziya təşkilatının Müşahidə Şurasının sədri Todung Mulya Lubis açıb. Sonra təşkilatın tədqiqatçısı Frenky Simancuntak MŞHT üzrə ümumi məlumat verib. Daha sonra MŞHT-nin Azərbaycan təcrübəsi barədə Q.İbadoğlunun təqdimatı dinlənilib. Bu təqdimatdan sonra suallar cavablandırılıb və müzakirələr aparılıb. Seminarın ikinci hissəsində kontraktlar və onların tətbiqi zamanı xərclərin hesablanması, neft məhsullarının qiymətləri üzrə tədqiqatların nəticələri təqdim olunub. Seminarın üçüncü hissəsində MŞHT-nin regionda tətbiqi məsələləri müzakirəyə çıxarılıb. Seminarın yekununda mətbuat konfransı keçirilib.