Açıq Cəmiyyət İnsititutu-Yardım Fondu tərəfindən maliyyələşdirilən filmdə əsasən ölkənin təbii sərvətlərinin istismarından əldə edilən gəlirlər, onlara ictimai nəzarətin təşkili və məsələrə yer alır. «Neft və Milyardlar Səltənətində» adlandırılan film artıq Gəncə, Tovuz, Mingəçevir televiziyalarında yayımımlanıb, yaxın vaxtlarda isə Sumqayıt, Quba, Zaqatalada nümaiş etdiriləcək. Bu haqda məlumatı Regional Uşaq Fondunun rəhbəri, sözügedən koalisyanın üzvü Rövşən Novruzov verib.

Dünya Bankının effektiv idarəetmə ilə bağlı açıqladığı hesabat Azərbaycan QHT-ləri tərəfindən öyrəniləcək. Bununla əlaqədar Mədən Sənayesində Şəffaflıq Təşəbbüsü üzrə QHT Koalisiyası və Milli Büdcə Qrupu birgə iş aparacaq. Dünən sözügedən QHT koalisiyası mövzu ilə bağlı ilk Dəyirmi masa keçirdi. Tədbiri açıq elan edən iqtisadçı İnqilab Əhmədov payızda bu məsələyə bir daha qayıdılacağını bildirdi. Qeyd edildi ki, Azərbaycan iqtisadçıları reytinqi hazırlayan müəlliflərlə də görüşmək imkanı qazanacaqlar.

İqtisadi Tədqiqatlar Mərkəzinin rəhbəri Qubad İbadoğlu Dünya Bankı İnstitutunun Mərkəzi Asiya, Cənubi Qafqaz ölkələri və Rusiya üzrə məlumatlarını diqqətə çatdırdı. O qeyd etdi ki, effektiv idarəetmənin indikatorları kimi əhalinin rəyinin nəzərə alınması və dövlət orqanlarının hesabatlılığı, siyasi sabitlik və zorakılığın olmaması, hökumətin işinin effektivliyi, qanunların mükəmməlliyi, aliliyi və korrupsiya ilə mübarizə götürülüb. Açıqlanan məlumatlar göstərir ki, Azərbaycan iqtisadi artım dövrünü yaşayır. Ölkənin maliyyə imkanları ildən-ilə artır. Buna görə də idarəetmənin keyfiyyəti də artırılmalıdır. Q.İbadoğlu bildirdi ki, Dünya Bankının açıqladığı hesabata görə, Azərbaycan növbəti 3 ildə iqtisadi artım tempini saxlayacaq. Onun sözlərinə görə, əhalinin rəyinin nəzərə alınması və dövlət orqanlarının hesabatlılığı şkalası üzrə 1996-cı ildən 2004-cü ilə qədər inkişaf müşahidə olunub. Son iki ildə isə bu sahədə problemlər olub. Amma ümumilikdə Azərbaycanın bu sahədəki göstəricisi region ölkələri ilə müqayisədə orta göstəricidən yaxşıdır. Bu sahədə ən yaxşı göstərici Gürcüstandadır. Amma 2007-ci ildə bu göstəricinin daha da yaxşılaşması proqnozlaşdırıla bilər. Çünki bu günlərdə şəffaflığın artırılması ilə bağlı milli strategiya təsdiqlənib, həmçinin Nazirlər Kabinetinin son toplantısında dövlət başçısı məmurlara şəffaflığın artırılması ilə bağlı tapşırıqlar verib. Bundan əlavə, ölkədə bürokratik əngəllərin aradan qaldırılması üçün bir sıra addımlar atılıb. Məsələn, biznes strukturlarının qeydiyyatındakı problemlərin həlli üçün "vahid pəncərə" sisteminin tətbiqi Azərbaycanın reytinqini qaldırmağa kömək edəcək.

Siyasi sabitlik və zorakılığın olmaması indikatoru üzrə Azərbaycanda vəziyyət region ölkələrinə nisbətən yaxşıdır. Bu sahədə 2006-cı ildəki göstərici 2005-ci ildəki göstəricini qabaqlayır. Bu göstərici üzrə region ölkələri arasında ən yaxşı göstərici Qazaxıstanda qeydə alınıb.

Hesabata görə, Azərbaycanda hökumətin işinin effektivliyi indikatoru üzrə ən yaxşı göstərici 2005-ci ilə qədər qeyd alınıb. Q.İbadoğlu bildirdi ki, 96-cı ildən başlayaraq hökumətin işində effektivlik arta-arta gedib. Sıçrayışlı irəliləyiş 2003-cü ildən sonra qeyd alınıb. Növbəti illərdə Azərbaycanın bu göstəricini daha da yaxşılaşdıracağını proqnozlaşdırmaq olar. Çünki artıq demək olar ki, bütün dövlət strukturlarında işə qəbul test üsulu ilə aparılır. Q.İbadoğlu bildirdi ki, Azərbaycan hökumətin işinin effektivliyi indikatoruna görə bir sıra region ölkələrini qabaqlayır.

Azərbaycan qanunların mükəmməlliyi indikatoru üzrə də region ölkələrinin bir hissəsini qabaqlayır. Bu prosesdə dinamizm müşahidə olunmaqdadır.

Korrupsiya ilə mübarizə indikatoru üzrə vəziyyət isə ürəkaçan deyil. Azərbaycanda bu istiqamətdə ən uğurlu il 2004-cü il olub. Məhz həmin ildə korrupsiyaya qarşı mübarizə haqqında dövlət proqramı, müvafiq qanunlar qəbul olunub. Azərbaycan korrupsiyaya qarşı mübarizə ilə bağlı beynəlxalq konvensiyalara qoşulub. Amma növbəti illərdə aparılan işlərin korrupsiyanın səviyyəsinə ciddi təsir etməməsi vəziyyəti mürəkkəbləşdirib.

Bütün bunlara əsaslanan Dünya Bankı İnstitutu region ölkələrinin reytinqlərini müəyyənləşdirib. Neft və qaz resursları ilə zəngin ölkələrin reytinq cədvəlində Azərbaycanın yeri kifayət qədər yaxşıdır. Rəsmi Bakı hökumətin işinin səmərəliliyi və qanunların mükəmməlliyi üzrə 4 bal, yerdə qalan indikatorlar üzrə isə 5 bal alıb. Azərbaycan bu sahədə Rusiyanı qabaqlayır. Rusiyada hökumətin işinin səmərəliliyi və qanunların mükəmməlliyi üzrə reytinq balı 5, yerdə qalan indikatorlar üzrə isə 6 olub. Qazaxıstanda da vəziyyət təxminən eynidir. Siyasi sabitlik, hökumətin işinin səmərəliliyi və qanunların mükəmməlliyi üzrə reytinq balı 5, yerdə qalanlar üzrə isə 6-dır. Türkmənistanda isə yalnız siyasi sabitliyə görə qeydə alınan 4 balı müsbət qiymətləndirmək olar. Yerdə qalan indikatorlar üzrə bu ölkənin göstəricisi 7 balla qiymətləndirilib.

Qeyd edək ki, Dünya Bankı İnstitutunun reytinq cədvəlində bütün göstəricilər üzrə ən yüksək qiymət alan ölkələr Finlandiya, İslandiya, Yeni Zelandiya, Norveç və İsveç olub. Ən pis göstərici isə Konqo, İraq, Birma, Somali, Özbəkistan və Türkmənistanda qeydə alınıb.

İlham QULİYEV

http://www.kaspi.az/iqtisadiyyat.htm

Kaspi qəzetinin 04.08.2007-ci il tarixli sayında dərc edilib.

◄ 1 ... 13 14 15 ... 41 ► ☼ A ₪

Sənədin sonuncu korrektə tarixi: 26/7/2008 - 12:12:53