Oktyabrın 5-də Beynəlxalq Mətbuat Mərkəzində (BMM) Azərbaycan Mədən Sənayesində Şəffaflıq Təşəbbüsü (MSŞA) çərçivəsində 2006-cı il üçün açıqlanmış 6-cı hesabata İctimai Birliklərin MSŞA Koalisiyasının rəyi açıqlandı. Koalisiyanın əlaqələndiricisi Qubad İbadoğlu bildirdi ki, hesabat dövründə ölkəmizin xeyrinə planlaşdırılan dəyişikliklər gözlənildiyi kimi qeydə alınmayıb: "2006-cı il AÇG (Azəri, Çıraq, Günəşli) sazişi çərçivəsində Azərbaycanın xeyrinə əhəmiyyətli dəyişikliyin baş verməsi planlaşdırılırdı. Lakin AÇG sazişində məsrəflərin kəskin artması səbəbindən Azərbaycan tərəfi şirkətlərlə müqayisədə gözlənilən yüksək rentabellik mərhələsinə keçə bilmədi".

Koalisiya hesab edir ki, hasilat tempinin artmasına baxmayaraq, Azərbaycan hələ ki, onun adekvat bəhrəsini görmür: "2006-cı ildə AÇG yatağında hasilatın tempi əvvəlki illə müqayisədə 50% artıb. Bununla yanaşı mənfəət neftinin bölgüsü hələ də şirkətlərin xeyrinədir. Bu halda yaranmış sual yenə də cavabsız qalır: niyə AÇG-nin şərtinə görə hökumətin payı gözlənildiyi mərhələyə keçməyib, hələ də əvvəlki mərhələdə qalmaqdadır?".

Bundan başq Koalisiya hesab edir ki, hasil olunmuş neftin tərəflər arasında bölgüsündə israfçılıq həddindən artıq çoxdur. Həmçinin 2006-cı ildə Azərbaycan hökumətinin qazancı mənfəət vergisindən formalaşıb. Belə ki, hesabat dövründə mənfəət vergisinin həcmi dövlətin mənfəət neftinin payından çox olub. "Hesabat dövründə xarici neft şirkətlərinin bütövlükdə büdcəyə ödədiyi mənfəət vergisinin 1,1 mlrd. dollar olması müqabilində hökumətin sırf mənfəət payının (ARDNŞ-in mənfəət payı nəzərə alınmasa) cəmi 524 mln. dollar olması dövlətin əsas gəlir mənbəyi olan pay bölgüsündən qazanclarının hələ də önəmli xarakter daşımadığını təsdiq edir. Baxmayaraq ki, Hasılatın Pay Bölgüsü sazişinin fəlsəfəsində dövlətin əsas gəlir mənbəyinin mənfəət neftinin bölüşdürülməsindən əldə olunan daxilolmalar hesabına formalaşması dayanır" - deyə, MSŞA Koalisiyasının rəyində bildirilir.

Koalisiyas bəzi istiqamətlər üzrə təkliflərin nəzərə alınmasını tövsiyyə edir: "Anlaşma Memorandumuna əlavə və dəyişikliklər barədə Razılaşma Memorandumu tərəflər arasında müzakirəyə çıxarılmalıdır. Hazırda qüvvədə olan Memorandumun tələblərindən irəli gələrək, Hasilatın Pay Bölgüsü sazişinin keyfiyyətcə yeni mərhələyə daxil olmasını əsas götürərək mövcud hesabat sisteminin təkmilləşdirilməsi məqsədilə tərəflər arasında müzakirələrə start verilməlidir.

Şirkətlərin fərdi qaydada hesabatlar təqdim etməsi istiqamətində digər şirkətlərə nümunə olmaq məqsədilə ARDNŞ hesabatlılığını fərdi qaydada həyata keçirilməlı və bu istiqamətli təşəbbüsə hökumət dəstək verməlidir. Şirkətlərin hesabatlılıq sistemində bilməyərəkdən yaranmış problemlərin miqyasının genişlənməsini və onun daim təkrar olunmasını nəzərə alaraq onların müvafiq heyəti üçün hesabatların doldurulması üzrə kurslar təşkil olunmalıdır. Memorandumun tərəflərin maraqları nəzərə alınmaqla və yuxarıda təklif olunan tövsiyələrin reallaşması da daxil olmaqla öhdəlik və məsuliyyətin konkret zaman çərçivəsində özündə əks etdirən və növbəti ildən start götürən Fəaliyyət Planının işlənilməsinə başlanılmalıdır.

Tədbirdə Koalisiya Şurasının üzvləri Sevgim Rəhmanov, Oqtay Gülalıyev və qurumun mətbuat xidmətinin rəhbəri Ramil Qasımzadə iştirak edirdi.

◄ 1 ... 26 27 28 ... 41 ► ☼ A ₪

Sənədin sonuncu korrektə tarixi: 26/7/2008 - 12:12:30